السحر انقلب على الساحر: هواوي تسحق إنفيديا بضربة قاضية!

من نجيب طاري الذكاء الاصطناعي وسيرفراته، أول اسم يركعله الكوكب هو NVIDIA (إنفيديا) وكروتها اللي مسيطرة على السوق. بس الظاهر العقوبات الأمريكية اللي چانت غايتها تخنق التقنية الصينية، اشتغلت بالعكس وسوت "سحر انقلب على الساحر"، وهواوي استغلت الفرصة حتى توجه ضربة موجعة لإنفيديا بقر دارها وتتفوق عليها!

الحصار اللي صنع "وحش" محلي

السالفة وما بيها، أمريكا منعت إنفيديا تصدر أقوى معالجاتها الخاصة بالذكاء الاصطناعي للصين بحجة الأمن القومي ومخاوف التطور التكنولوجي. إنفيديا حاولت ترگعها ونزلت نسخ "مخففة" ومقيدة (أضعف من النسخ العالمية) مخصصة للسوق الصيني حتى تمشي شغلها وما تخسر هالسوق الضخم اللي يدر عليها مليارات.

بس الشركات الصينية العملاقة (مثل بايدو، علي بابا، وتينسنت) باوعت لهالنسخ المخففة وگالت: "شنو دتضحكون علينا؟". وهنا دخلت هواوي للساحة شايلة الحل السحري: شرائح Ascend.

شرائح Ascend: من بديل طوارئ إلى خيار أول!

هواوي ما كعدت تتفرج وتبچي على الأطلال، طورت معالجات الذكاء الاصطناعي مالتها (عائلة Ascend) بشكل مرعب. التقارير الجديدة تأكد إن هواوي گدرت تتفوق فعلياً على إنفيديا بالسوق الصيني وتسحب البساط من جوه رجلها.

الشرائح الجديدة مال هواوي دتنطي أداء يوازي وأحياناً يتفوق على النسخ "المقصوصة" اللي دتبيعها إنفيديا بالصين. والأهم من هذا كله، الشركات الصينية صارت تفضل تشتري من هواوي لأنها تضمن استمرارية الدعم وماتخاف من أي عقوبات أمريكية مفاجئة توقف شغلهم وتجمد سيرفراتهم.

إنفيديا في ورطة.. والأسواق تترقب

هسه إنفيديا واكعة بموقف لا تحسد عليه؛ من جهة مقيدة بقوانين الحكومة الأمريكية وممنوعة من بيع أفضل منتجاتها، ومن جهة ثانية دتشوف سوق چبير ديطير من إيدها ويروح لعدوها اللدود هواوي اللي دتبني منظومة متكاملة ومستقلة.

هواوي دتثبت يوم بعد يوم إن سياسة "الاعتماد على النفس" دتطلع نتائج تخوف، واليوم سيطرت على الصين، وباچر الله يعلم وين توصل.