سنين طويلة وإحنا متعودين إن معالج سامسونج "الإكسينوس" هو المعالج المغضوب عليه. حرارة، صرف بطارية، وأداء أقل من السناب دراجون. بس الظاهر سامسونج قررت تنهي هاي المهزلة وتضرب كوالكوم بقر دارها، والتقارير الجديدة المسربة من كوريا دتأكد إن وحش سامسونج الجاي، Exynos 2700، ديحقق أرقام تخوف!
أرقام تكسر الشاشة.. تفوق بـ 20%!
التسريبات كشفت عن اختبارات داخلية (يعني مو نهائية، بس تنطينا فكرة مرعبة) تبين إن الإكسينوس 2700 كدر يتفوق على أعتى وأقوى معالجات كوالكوم الحالية (Snapdragon 8 Elite Extreme Gen 6)!
- تعدد الأنوية (Multi-Core): الإكسينوس جاب حوالي 13,000 نقطة باختبار Geekbench 6.5، مقابل 11,000 للسناب دراجون! يعني ديحچي بتفوق يوصل لـ 20%، وهذا رقم مو سهل بعالم المعالجات.
- الرسوميات (GPU): بالألعاب والجرافيكس، الإكسينوس سجل تفوق 20% ببعض الاختبارات، بس نزل لـ 5% باختبارات ثانية للألعاب الـ 3D، يعني الأداء مستقر وقوي.
السر ورا هاي الصحوة؟
سامسونج ما جابت هالأرقام من فراغ، الخلطة الجديدة دتعتمد على:
- دقة تصنيع 2 نانومتر: هاي الدقة راح تقلل صرف البطارية وتقلل الحرارة بشكل چبير.
- تصميم 10 أنوية: المعالج جاي بـ 10 أنوية (عشر عقول تفكر وتشتغل سوية)، ويا كارت شاشة جديد Xclipse 970، ورام من نوع LPDDR6 اللي يعتبر الأسرع بالسوق حالياً.
طبعاً نرجع ونكول هاي اختبارات أولية، وبعدنا ما نعرف أداء التلفون "تحت الضغط" بالاستخدام اليومي وصرف البطارية الفعلي. بس المؤكد إن سلسلة الـ Galaxy S27 الجاية راح تنطرح بالأسواق (وممكن منطقتنا من ضمنها) بهذا المعالج، وهذا يرجع الأمل لنسخ الإكسينوس.
إذا ثبتت هاي الأرقام وصار الإكسينوس فعلاً أقوى وأبرد من السناب دراجون، هل راح تتصالحون ويا سامسونج وتاخذون نسخة الإكسينوس بدون خوف، لو بعدكم ما تثقون بيه وتفضلون كوالكوم مهما صار؟
التعليقات
0 تعليقلا توجد تعليقات بعد. كن أول من يعلق!