صدمة الموسم.. سامسونج تستفز عشاقها

من تقرأ عنوان الخبر بموقع Unlimit-Tech (ترقية مهمة في سرعة شحن جالكسي S27 بلس)، راح يطفر گلبك وتكول أخيراً سامسونج حست بينا وراح تعبر حاجز الـ 45 واط وتلگف الشركات الصينية. بس من تفوت بالتفاصيل، راح تنصدم إن السالفة بيها "مقلب" مرتب!

الشهادات الجديدة اللي طلعت من منصات السلامة دتأكد وتوثق سرعات الشحن لسلسلة Galaxy S27 الجاية، والأرقام خلتنا نصفن.

وين الترقية بالموضوع؟ السالفة "نسخ ولصق"!

• Galaxy S27+ (نسخة البلس): الشهادات (مثل 3C الصينية وغيرها) أكدت إن التلفون راح يجي بشحن سريع بقدرة 45 واط (15 فولت / 3 أمبير). يعني نفس السرعة اللي شفناها بالـ S26 بلس، والـ S25 بلس، وصولاً للـ S22 بلس! تخيل، هذا الجيل السادس على التوالي وسامسونج لازكة على رقم 45 واط وما تقبل تصعده.
• Galaxy S27 (النسخة العادية): الوضع هنا أتعس، الشهادات أكدت إن النسخة الأساسية راح تبقى "قافلة" على سرعة شحن 25 واط بس! يعني بسنة 2027، وبعدنا دنشحن التلفون الفلاجشيب بـ 25 واط.

ليش سامسونج دتسوي هيج؟

سامسونج من يوم أزمة نوت 7 صارت تعاني من "فوبيا البطاريات"، وتفضل تمشي بالسليم (Safety First). الشركات الصينية مثل شاومي وهونر ديقدمون شحن 120 واط و 100 واط ببطاريات عملاقة، وسامسونج تعتبر هالشي يقلل من عمر البطارية الافتراضي ويزيد حماوة التلفون.

كل التوقعات تشير إن الكشف الرسمي عن السلسلة راح يكون بشهر الواحد أو الثاني، وسرعات الشحن هاي راح تكون موحدة بكل الأسواق (العالمية، الكورية، والأمريكية).

الخلاصة.. إذا منتظر سامسونج تفول تلفونك بربع ساعة، أنسى الموضوع وحضر نفسك تشمره عالشاحن وتنتظر.

شنو رأيكم بعناد سامسونج؟ هل تشوفون الـ 45 واط والـ 25 واط سرعات كافية وتحافظ على عمر البطارية، لو تعتبروها فضيحة بحق أجهزة فلاجشيب غالية بعام 2027؟