عاجل
وداعاً لزر الأكشن! آبل تصدمنا وتدمج الازرار بالآيفون القادم!
أخبار التقنية

وداعاً لزر الأكشن! آبل تصدمنا وتدمج الازرار بالآيفون القادم!

آبل الظاهر متقعد راحة ويا الأزرار (الدكم) مال الآيفون. من بعد ما شالوا دكمة الصامت (Mute Switch) وحطوا بمكانها زر الأكشن (Action Button) بالآيفون 15 برو، وبعدين ضافوا زر الكاميرا (Camera Control)، هسه التسريبات تكول إنهم ناوين يرجعون يقللون الدكم ويشيلون واحد منهم!

التقرير اللي نشرة موقع Unlimit-Tech مبني على تسريبات من منصة Weibo، يكشف عن تغييرات چبيرة بتصميم أجهزة الآيفون المستقبلية (المنتظرة بالنصف الثاني من 2027).


زر واحد يعمل كل شيء

حسب التسريب، آبل راح تستغني عن زر Action Button بشكل مستقل، بس ما راح تلغي وظائفه، وإنما راح تدمجها ويا زر التحكم بالكاميرا (Camera Control) اللي ديشتغل باللمس والضغط.

شلون راح تصير السالفة؟

  • ضغطة وحدة: تفتح تطبيق الكاميرا كالعادة.
  • ضغطة مطولة (Long Press): راح تشغلك الاختصار اللي چنت مخصصه لزر الأكشن (مثلاً تضوي الفلاش، تفتح المايك، أو تشغل تطبيق معين).

يعني آبل تريد تنطينا جهاز حوافه "أنظف" وبدكم أقل، بس بنفس الوقت تحافظ على الميزات اللي تعودنا عليها.

تغييرات ثانية بالتصميم

هاي السالفة دتتزامن ويا تسريبات ثانية دتكول إن طرازات الـ Pro الجاية راح يجي بيها تغيير جذري بالشكل، واكو نماذج دتتختبر حالياً بشاشات "منحنية من الجهات الأربعة" (Quad-Curved)، يعني آبل دتحاول تخلي الآيفون الجاي تحفة فنية متصلة ببعضها وبأقل عدد ممكن من الفتحات والأزرار.

الخلاصة.. آبل دتمهد الطريق رويداً رويداً لجهاز "بدون أزرار نهائياً" يعتمد كله على اللمس والضغط (Haptic Feedback).


شنو رأيكم بدمج زر الأكشن ويا الكاميرا بدكمة وحدة؟ هل تشوفوها فكرة ذكية تختصر علينا، لو تحبون كل زر إله وظيفته ومكانه الخاص حتى لا تخربطون بالاستخدام؟


المصدر: weibo.com

التعليقات

0 تعليق

لا توجد تعليقات بعد. كن أول من يعلق!